ಎದೆಯ ಹಾಡು


ನಾಗರಾಜ ಹರಪನಹಳ್ಳಿ

 


 

ನಾವಿಬ್ಬರೂ ಸೋತವರು
ಬಯಲ ಬೆಳಕಲ್ಲಿ ಕೂತು ಧ್ಯಾನ
ಒಬ್ಬರ ಬೊಗಸೆಯಲ್ಲಿ ಇನ್ನೊಬ್ಬರ ಮುಖವಿಟ್ಟು 
ಕಳೆದವರ ಸುಳಿದು ಬೀಸುವ ಗಾಳಿಯಲಿ ಎಳೆದು ತರೋಣ
ನಾಲ್ಕು ಹನಿ ಕಣ್ಣೀರ ಹರಿಸೋಣ

ಹರಿವ ನದಿ ಕಣ್ಣಂಚಲಿ ಸಂತೈಸುತ್ತಿರಲಿ 
ಕೆನ್ನೆಯ ಮೇಲೆ ಹರಿದ ತೊರೆಗೆ
ನೆಲದಲ್ಲಿನ ಕನಸ ಬೀಜಗಳು 
ನಾಳೆಯನ್ನ ಹಸಿರಾಗಿಸಲಿ

ನಮ್ಮಿಬ್ಬರ ನಿಟ್ಟುಸಿರು
ಗಾಳಿಯಲಿ ಬೆರತು ಬಯಲ ಆಕಾಶ ಸೇರಲಿ ಬಿಡು
ಅಲ್ಲಿ ಅವು ಕಪ್ಪನೆಯ ಮೋಡವಾಗಿ
ಮಳೆ ಸುರಿದು ಬಿಡಲಿ
ನೆಲ ಮುಗಿಲು ಒಂದಾಗಿ
ನಗುತಿರಲಿ ನನ್ನವ್ವನೊಡಲು 

ನಾವು ಆಡಿದ ಮಾತು
ಕಾವ್ಯ
ನಮ್ಮವರ ಎದೆತುಂಬಲಿ
ಅಳಿದು ಹೋಗಲಿ ಹಗೆ
ಇಲ್ಲವಾಗಲಿ ದ್ವೇಷದ ಜ್ವಾಲೆ
ನಮ್ಮವರ ಬದುಕು ಜಂಗಮವಾಗಲಿ 
ಹಾದಿ ತುಂಬಾ ನನ್ನವ್ವನ ಕನಸು 
ಬೆಳದಿಂಗಳ ಬೆಳಕಾಗಲಿ
ಬಯಲ ಆಗಸದ ತುಂಬೆಲ್ಲಾ ಕಾಳು ಚೆಲ್ಲಿದ ನಕ್ಷತ್ರ

***