ಒಂದು ಗಜಲ್

ನಿನ್ನ ಕನಸು ಪುಟ ತುಂಬಿರುವಾಗ ಏನೆಂದು ಬರೆಯಲಿ?
ಮನದ ತುಂಬ ಮೌನ ತುಂಬಿರುವಾಗ ಏನೆಂದು ಬರೆಯಲಿ?

ಬೆತ್ತಲಾದ ಬಯಕೆಗಳಿಗೆ ಬಟ್ಟೆ ತೊಡಿಸುವುದು ಹೇಗೆಂದು ಕಲಿಯಬೇಕಿದೆ ನಾನು
ನೀನೆ ಇಲ್ಲದ ಒಬ್ಬಂಟಿ ಈ ದಾರಿಯ ದುಃಖದಲ್ಲೀಗ ಏನೆಂದು ಬರೆಯಲಿ?

ನೆರಳಾಗಲೆಂದು ನೆಟ್ಟ ಮರಕ್ಕೀಗ ಎಲೆಯೇ ಮೂಡದೇ ಬೆತ್ತಲಾಗುತ್ತಿದೆ
ಬೆರಳು ತಾಕಿದರೂ ಮೂಡದ ರಾಗದಲ್ಲಿ ಮನಬಿಚ್ಚಿ ಈಗ ಏನೆಂದು ಬರೆಯಲಿ?

ಖಾಲಿಯಿದ್ದ ಗೋಡೆಯ ತುಂಬ ನಿನ್ನದೆ ಚಿತ್ರಗಳು ನನ್ನ ನೋಡಿ ಅಣಕಿಸುತ್ತಿವೆ
ಮೊಂಬತ್ತಿಯ 'ಪ್ರಕಾಶ'ವು ಕಣ್ಣೀರ ಸುರಿಸಿದಲ್ಲಿ ಮೂಡದ ಭಾವನೆಯೀಗ  ಏನೆಂದು ಬರೆಯಲಿ?


-ಪ್ರಕಾಶ್ ಬಿ.ಜಾಲಹಳ್ಳಿ ಅವರ  'ನಲವತ್ತು ಗಜಲುಗಳು'  ಸಂಕಲನದಿಂದ