ಎರಡು ಕವಿತೆಗಳು: ಡಾ. ಜಿ. ಕೃಷ್ಣ

ದೃಷ್ಟಿ 

ನಿನ್ನೆ ಕನ್ನಡಕ ಬದಲಾಯಿಸಿದೆ
ದೂರ ದೃಷ್ಟಿ ಹತ್ತಿರದ್ದು
ಎರಡೂ ಎಕ್ಕುಟ್ಟಿದ್ದವು
ಈ
ದ್ವಿದೃಷ್ಟಿಯ
ಚಸ್ಮ
ಮೂಗನೇರಿ ಕುಳಿತಾಗ
ನನ್ನ ದಡ್ಡ ಕಣ್ಣುಗಳು
ಹತ್ತಿರದ್ದನ್ನು
ದೂರದಲ್ಲಿ
ದೂರದ್ದನ್ನು ಹತ್ತಿರದಲ್ಲಿ
ಕೀಲಿಸಲು ಹೋಗಿ
ಎರಡೂ ಕಲಸು
ಕಣ್ಣಿಗೆ
ಪಾಠ ಹೇಳಬೇಕಿದೆ
ದೂರ
ಹತ್ತಿರಗಳೆರಡೂ
ನಿಚ್ಚಳವಾಗಬೇಕಿದೆ.






ಅಂದಿನ ಚಿತ್ರ

ಅಂದು
ಶಿಲಾಯುಗದ ಹೆಸರಿಲ್ಲದ
ಒಂದು ದಿನ
ಬೆಳಗಿಡೀ ಸುತ್ತಿ
ಬೇಟೆಯಾಡಿದ್ದ
ಹಸಿ ಹಸಿ ತಿಂದು
ಸಂಜೆ
ಹೊತ್ತು ಹೋಗದ್ದಕ್ಕೆ
ಕಲ್ಲುಬಂಡೆಯ ಮೇಲೆ
ನಾಕು ಚಿತ್ರ ಬರೆದೆ
ಮರೆತೆ
ಇವತ್ತು ಹಬ್ಬದಡಿಗೆ ಉಂಡ
ತೂಕಡಿಕೆಯಲ್ಲಿ
ಕನವರಿಸಿದೆನಂತೆ
ಮಗಳು ಎಬ್ಬಿಸಿ
ಸೀದಾ ಅಲ್ಲಿಗೇ ಕರೆದೊಯ್ದು
ನಿಲ್ಲಿಸಿದಾಗ
ಅವಳ ಕೈಯ
ಬಿಸಿಯಲ್ಲಿ
ಆ ಚಿತ್ರಗಳೆಲ್ಲ ಮಲಗಿದ್ದವು
ಎಬ್ಬಿಸಲಿಲ್ಲ
ಮೇಲೊಂದು 
ಹುಲ್ಲುಗರಿಕೆ ಹೊದಿಸಿ
ಸದ್ದಿಲ್ಲದೆ
ವಾಪಾಸು ಬಂದೆವು.