ಮುಂದಿನ ತೆಯ್ಯಮ್ ವರೆಗೆ...

ಡಾ. ಜಿ. ಕೃಷ್ಣ

 

ಇದು ತೆಯ್ಯಮ್
ವೆಂಕಟೇಶ್ವರ ಮಹೇಶ್ವರ
ಪಾರ್ವತಿ ಪದ್ಮಾವತಿಯರ
ಲಾಸ್ಯ ಇದಲ್ಲ
ಶಂಕ ಚಕ್ರ ಗದಾ ಪದ್ಮಧಾರಿಗಳು
ಇಕ್ಷುಚಾಪ ಹಿಡಿದವರು
ದೂರ ನಿಂತೇ ದರ್ಶನ ನೀಡಿ
ಆಶೀರ್ವದಿಸಿ ಕಳಿಸುವ
ತಂತ್ರ ಇದಲ್ಲ

ಪೊರೆದೇ ಪೊರೆವೆನೆಂಬ
ಅಭಯದ ದಿಗಿಣ
ಕಣ್ಣರಳಿಸಿ ಗದರುವ
ತಾಯಿಗುಣದ ವಾಗ್ದಾನ

ಇಲ್ಲಿ ಮೇಲು ಕೀಳಿಲ್ಲ
ಕೀಳೇ ಮೇಲು
ಸಪಾದ ಭಕ್ಷ, ಪಂಚಕಜ್ಜಾಯಗಳಲ್ಲ
ಹಸಿ ಮಾಂಸ ಬಿಸಿರಕ್ತದೋಕುಳಿಯೆ
ನೈವೇದ್ಯ

ದಿನದ ಕೀಳು ಜೀವ
ಮೈದುಂಬಿದಾಗ
ಎತ್ತರೆತ್ತರಕ್ಕೆ ಏರಿ
ದೈವವೇ ಆಗಿ
ಜನಿವಾರಿಗಳನ್ನು
ಆಳುವವರನ್ನು, ಕೀಳುವವರನ್ನು
ಕಾಲಡಿಗೆ ಬೀಳಿಸಿಕೊಳ್ಳುತ್ತದೆ

ತೆಯ್ಯಮ್ ಮುಗಿದ ಬೆಳಿಗ್ಗೆ
ಬೇಲಿಯಾಚೆಯ ಮರದಡಿ
ಕುಳಿತಿರುತ್ತಾನೆ
ದೇವತಾ ಮನುಷ್ಯ
ತಾನು ಅಭಯ ಕೊಟ್ಟವರ
ಅಂಗಳಕ್ಕೂ ಕಾಲಿಡುವ ಹಕ್ಕಿಲ್ಲದೆ
ಮಾಮೂಲಿನಂತೆ
ಮುಂದಿನ ತೆಯ್ಯಮ್ ವರೆಗೆ...

***