ತಿಳಿಯಲಿಲ್ಲ 

ಸಂವರ್ತ 'ಸಾಹಿಲ್'

  

   

 

ಮಲ ಹೊರುವ ತಲೆಯ ಮೇಲೆ
ಸಂಜೆಯಾಟದಲ್ಲಿ ಒಂದು
ಗರಿ ಸಿಕ್ಕಿಸಿಕೊಂಡಾಗ
ಹ್ಯಾಟ್ ತೊಟ್ಟವರೆಲ್ಲ
ಅಣಕಿಸಿದ್ಯಾಕೋ ತಿಳಿಯಲಿಲ್ಲ!

ಅಕ್ಷರ ಬೆಳೆಯದ ನೆಲದ ಮೇಲೆ ನಿಂತು
ಬರೆದ ಎರಡು ಸಾಲು ಕಾವ್ಯ
ಪ್ರಶಂಸೆಯನ್ನು ಕಾದಿದ್ಯಾಕೋ
ತಿಳಿಯಲಿಲ್ಲ!
ನಿಮ್ಮ ಪ್ರಶಂಸೆಗೆ
ತುಸು ಬೀಗಿದಾಗ
ಅಕ್ಷರ ಲೋಕಕ್ಕೆ
ಅಸಹ್ಯವೆನಿಸಿದ್ಯಾಕೋ ತಿಳಿಯಲಿಲ್ಲ!

ಬೆವರು ಸುರಿಸಿ
ಬೆವರ ವಾಸನೆ ತಪ್ಪಿಸಲು
ಪೌಡರ್ ಖರೀದಿಸಿ
ಕಂಕುಳದಲ್ಲೊಂದಿಷ್ಟು ಹಾಕಿಕೊಂಡ ಹೊತ್ತು
ಸೆಂಟಿನ ಜೀವಗಳು
ತಮಾಷೆ ಮಾಡಿದ್ಯಾಕೋ, ತಿಳಿಯಲಿಲ್ಲ!

ವ್ಯವಸ್ಥೆಯ ಬಗ್ಗೆ ಸಿಟ್ಟಾಗಿ
ಬಯ್ಯುವ ಹೊತ್ತು
'ಸಾಟ' ಎಂದಾಗ
ಆ
ಒಂದೇ ಒಂದು ಪದ
ಸಿಟ್ಟನ್ನೆಲ್ಲಾ ಮರೆಮಾಚಿ
ಜನರನ್ನು ನಗಿಸಿದ್ದು ಹೇಗೋ, ತಿಳಿಯಲಿಲ್ಲ!

***