ಕೋಗಿಲೆ ಕೂಗುವುದಿಲ್ಲ

ಜಿ ಎಸ್ ಅವಧಾನಿ

 

ನನಗೆ ಧಿಗಿಲಾದದ್ದು
ಈ ಮನೆಯೊಳಗೆ
ಗಾಳಿಬೆಳಕು ಇಲ್ಲದ್ದಕ್ಕಲ್ಲ
ಸಿಟಿಬಸ್ಸಿಗೆ ಗಂಟೆಗಟ್ಟಲೆ
ಕಾದು ಪೇಟೆ ದವಾಖಾನೆ
ಅಥವಾ ಬಸ್ ನಿಲ್ದಾಣಗಳಿಗೆ
ಹೋಗಬೇಕು ಎಂಬುದಕ್ಕಲ್ಲ

ಅಕ್ಕಪಕ್ಕದ ಮಂದಿ
ಕಂಡೂ ಕಾಣದವರಂತೆ
ಮೊಗಂ ಆಗಿ ಇರುವುದಕ್ಕಲ್ಲ
ಮಲೆನಾಡಿನ ಹೆಪ್ಪುಗಟ್ಟುವ
ಚಳಿಗೆ ಒಂದಿಲ್ಲೊಂದು
ಅಲವರಿಕೆಯಲ್ಲಿ ಅಸ್ವಸ್ಥರಾಗುವುದಕ್ಕಲ್ಲ

ಮುಂಜಾನೆ ಹಾಸಿಗೆಯಲ್ಲೇ
ಕಣ್ಣುತೆರೆದು ಬಳಿಗೆ ಕರೆದು
'ಅಜ್ಜಾ, ಹೊನ್ನಾವರಕ್ಕೆ ಹೋಪ'
ಎಂದು ತೊದಲಿದ ಎರಡು ವರ್ಷದ
ಮುದ್ದು ಮಗುವನೆತ್ತಿಕೊಂಡು ಕೇಳಿದೆ
'ಯಾಕೆ?'
ಅವಳು ತಟ್ಟನೆ
'ಇಲ್ಲಿ ಕೋಗಿಲೆ ಕೂಗ್ತೇ ಇಲ್ಲ'
ಎಂದು ಹೇಳಿದ್ದಕ್ಕೆ!

***