ಯಾಕೆ ಕಾಡುತ್ತೀಯ ಮಾಧವ?



ಎಂ. ಆರ್. ಕಮಲಾ 

ಯಾಕೆ ಕಾಡುತ್ತೀಯ ಮಾಧವ 
ಜೋಪಡಿಯ ಈ ಬಡ ಗೋಪಿಕೆಯ? 

ವೈಶಾಖದ ಬಿರುಬಿಸಿಲಲಿ 
ಕೊರೆವ ಮಾಗಿ ಮಂಜಿನಲಿ
ಯಮುನೆಯಲೆಯಲೆಯಲ್ಲಿ
ಮಡಿಲ ಕಂದನಲಿ
ನೀನೆ ನಿಲ್ಲುತ್ತೀಯ
ಯಾಕೆ ಕಾಡುತ್ತೀಯ?

`ಅತ್ತೆ ಮಾವರಿಗಂಜಿ, ಸುತ್ತೇಳು ನೆರೆಗಂಜಿ'
ಬದುಕ ಸವೆಸುವವಳಿಗುಂಟೆ
ರಾಧಿಕೆಯ ಎದೆಗಾರಿಕೆ?
ಕೊಳಲ ದನಿಗೆ ಕರೆ ಕರೆಗೊಂಡರೂ ಎದೆ
ಮೊರೆತ ನಿಲ್ಲಿಸಬೇಕು
ಲಯಬದ್ಧ ಕಡೆಗೋಲು ಕುಣಿತಕ್ಕೆ
ಸಿಡಿದರು ನೂರು ಜತಿಗಳು
ತಾಳ ತಪ್ಪಿಸಬೇಕು
ಹೆಜ್ಜೆ ಗೆಜ್ಜೆಗಳುಲಿತ
ಯಮುನೆಗಪ್ಪಳಿಸದಂತೆ
ಮೌನವಾಗಿಸಬೇಕು

ಯಾಕೆ ಕಾಡುತ್ತೀಯ ಮಾಧವ
ಯಮುನೆಯುದ್ದಕ್ಕೂ ಹರಿದ ಪ್ರೀತಿಯ
ಪುಟ್ಟ ಎದೆಗೊಡದಲ್ಲಿ ಮುಚ್ಚಿಟ್ಟು
ದಿಟ್ಟಿಸುತ ನಿಟ್ಟುಸಿರಿಡುವ
ಜೋಪಡಿಯ ಈ ಗೋಪಿಕೆಯ???

***