ಡಾ.ಎಚ್.ಎಸ್ ಅನುಪಮಾ : ಎರಡು ಕವಿತೆಗಳು



1.
ಗಾಳಿಗೆ ಹೊಯ್ದಾಡುವ ಕೂದಲು
ತುಟಿ ಮೇಲಿನ ಮಾಸದ ನಗೆ
ವಿಳಾಸ ತಿಳಿಸದ ಒಂದು ಪಿಸು ಮಾತು
ಮೈಮನಗಳ ಅಕಾರಣ ಖುಷಿ
ಎಲ್ಲದರಲ್ಲೂ 
ಸೂಳೆತನ ಹುಡುಕುವ ಲೋಕವೇ,
ಧಿಕ್ಕಾರ!

ಮೊಳೆವ ಬೀಜ, ಅರಳುವ ಮೊಗ್ಗು
ಚಿಗುರಿದ ಎಳೆ ಗರಿಕೆಯ
ಮೃದು ಸ್ಪರ್ಶ
ನಿನ್ನಲ್ಲಿ ರೋಮಾಂಚನ ಹುಟ್ಟಿಸದೇ ಹೋಗಲಿ..

2.
ಕಣ್ಣು ತುಂಬಿ ನಿಂತ ಬೆಳಕಿನ ಹನಿಯೇ, 
ಕೆಳಗುರುಳಬೇಡ. 
ಇಳಿದು ಬಿಡು ನನ್ನ ಆಳಾಳಕ್ಕೆ; 
ಗಂಟಲಿಗೆ, ನಾಭಿಗೆ, ಅಂತರಾಳದ ಮೂಲಕೆ. 
ದಾಹಿ ಜೀವ ತೇವಗೊಳ್ಳಲಿ. 
ಬಂಡೆಕಲ್ಲಿನಲ್ಲಿ ದೇವರನ್ನೂ, 
ಹೂವಿನಲ್ಲಿ ಅನುಗ್ರಹವನ್ನೂ, 
ಕೆಂಪುಪುಡಿಯಲ್ಲಿ ಪೌರುಷವನ್ನೂ 
ಕುರುಹುಗಳಲ್ಲೇ ಇರವನ್ನು ಅರಸುವ ಲೋಕ 
ತೇವಗೊಂಡು ಹೊಳೆವ ಕಣ್ಣುಗಳಲ್ಲಿ 
ನನ್ನ ನೆಮ್ಮದಿಯ ಮೂಲ ಹುಡುಕಲಿ. 
ಕಣ್ಣಕನ್ನಡಿಯ ಪ್ರತಿಬಿಂಬಕ್ಕೆ ಏನಾದರೂ ಹೆಸರಿಡಲಿ. 

***