ಸುಲಭವಲ್ಲ

ಸುಲಭವೇ ನದಿ ನೀರು ಹಂಚಿಕೊಳ್ಳುವುದು?

ಸುಲಭವಲ್ಲ, ಸಿದ್ಧಾರ್ಥ ಬುದ್ಧನಾದ ತಲ್ಲಣವದು

ಯಾವ ಋತುವಿನಲಿ ಉಕ್ಕೇರುವುದೋ

ಯಾವ ವರುಷದಲಿ ಪಾತ್ರ ಬರಿದಾಗುವುದೋ

ಜೀವಸೆಲೆಗೆ ಎಂದು ಯಾವ ಕುತ್ತೋ?

ಗೊತ್ತಿಲ್ಲ ನದಿಗೂ ಇದು

ಸುಲಭವೇ ನದಿ ನೀರು ಹಂಚಿಕೊಳ್ಳುವುದು?

ಸುಲಭವಲ್ಲ ಹುಟ್ಟಲಿರುವ ಕೂಸಿನ ನಗು ಹಂಚಿಕೊಳ್ಳುವುದು.

ಗಡಿಗೆರೆಗಳಿರದ ನೀರಿನ ಹರಿವು 

ತೀರ ಒಡೆಯಬಹುದು ಆಳ ಸುಳಿಸೆಳವು

ತಗ್ಗನರಸಿ ಹರಿವ ನೀರ ಮೇಲೆ

ಹಕ್ಕು ಅಧಿಕಾರದ ಮೋಹ ದಿಬ್ಬದ ಮೇಲಿರುವವರಿಗೆ 

ಸುಲಭವೇ ಹರಿವ ನೀರ ಹಂಚಿಕೊಳ್ಳುವುದು?

ಸುಲಭವಲ್ಲ ನೆಗೆವ ಪಾದದ ಜಿಗಿತ ಹಂಚಿಕೊಳ್ಳುವುದು..

ಸಿಕ್ಕಾಗ ಸಿಕ್ಕಿರುವಷ್ಟು ಕುಡಿದರೂ 

ದಾಹದ ನೆನಪಿಗೇ ತುಟಿ ಒಣಗಿ ಬಿರಿಯುವುದು 

ಬಾಯಾರಿದವನ ಒಡಲ ಬೇಗೆ

ದಕ್ಕೀತೆ ಕೋರ್ಟು ಕಾನೂನಿಗೆ

ಸುಲಭವೇ ಸಿಕ್ಕಷ್ಟು ನೀರು ಹಂಚಿಕೊಳ್ಳುವುದು?

ಸುಲಭವಲ್ಲ ಜೀವ ಜಲ ಪ್ರೇಮ ಹಂಚಿಕೊಳ್ಳುವುದು..

-ಡಾ. ಎಚ್.ಎಸ್ ಅನುಪಮಾ